ખોટા મેસેજથી ચેતજો:સીમ કાર્ડ બ્લોક થઈ જશે તેવો મેસેજ કરીને અમદાવાદના સિનિયર સિટીઝનના બેંક ખાતામાંથી 17 લાખ ઉપાડી લીધા

જેમ જેમ બેંકિંગ સેવાઓ અને મોબાઈલ સેવાઓ આધુનિક બની રહી છે તેમ તેમ ઠગાઈના ગુનાઓ વધી રહ્યાં છે. શહેર હોય કે ગામ હોય હવે યુવાનોની સાથે વૃદ્ધો પણ સાયબર ફ્રોડનો ભોગ બની રહ્યાં છે. અમદાવાદમાં એક સિનિયર સિટિઝનને મેસેજ આવ્યો હતો કે, BSNLનું સિમ કાર્ડ બ્લોક થઈ જશે જેથી મેસેજમાં આપેલ નંબર પર ફોન કરવા જણાવ્યું હતું જેમાં ફોન કરતાં તેમના મોબાઈલમાં એપ્લિકેશન ડાઉનલોડ કરવી તેમાં પાસવર્ડ નખાવી દસ રૂપિયા ટ્રાન્સફર કર્યા હતા અને ત્યારબાદ આરોપીએ તેમના ખાતામાંથી અલગ અલગ સમયે 17 લાખથી વધુ રૂપિયા ઉપાડી લીધા હતા.

સિનિયર સિટીઝનને મેસેજ કરીને છેતરપિંડી આચરી
સોલા પોલીસ સ્ટેશનમાં નોંધાયેલી ફરિયાદ પ્રમાણે અમદાવાદના ઘાટલોડિયામાં રહેતા સિનિયર સિટિઝન નેશનલ ઇન્સ્યોરન્સ કંપની લિમિટેડ માંથી રીટાયર્ડ થયેલ છે અને નિવૃત્ત જીવન જીવે છે. ગત 31મી જાન્યુઆરીએ રાત્રે સાડા નવ વાગ્યે તેઓ મોબાઈલ જોતા હતાં. તેમાં અજાણ્યા મોબાઈલ નંબર પરથી BSNL alert We will be blocked Your Bsnl Sim Please Call Customer Care તેવો મેસેજ આવ્યો હતો. આ મેસેજ જોયા બાદ મેસેજમાં આપેલ ફોન નંબર પર તેમણે ફોન કર્યો હતો. સામેવાળી વ્યક્તિએ તેમને જણાવ્યું કે, તમારું સીમકાર્ડ ચાલુ રાખવું હોય તો હું જે લિંક મોકલું તેમાં દસ રૂપિયા ભરવા પડશે તેમ કહીને તેમના મોબાઈલમાં એક લિંક મોકલી હતી અને આ લીંક દ્વારા આરોપીએ કવિક સપોર્ટ નામની એપ્લિકેશન ડાઉનલોડ કરાવી હતી.