એક તરફ શોક સભાઓ, બીજી તરફ ભયાનક હુમલો: લેબેનોનમાં ઈઝરાયલે 100 એરક્રાફ્ટથી કરી એરસ્ટ્રાઈક

ઈઝરાયલમાં એક તરફ 7 ઓક્ટોબરના હુમલાની વરસી પર શોકસભાઓ ચાલી રહી હતી તો બીજી તરફ તેની સેના યુદ્ધ લડી રહી હતી. સોમવારે ઇઝરાયલે હિઝબુલ્લાહ દ્વારા કરવામાં આવેલા 130 રોકેટ હુમલાનો જવાબ તેના 100 ફાઈટર પ્લેન સાથે લેબેનોનમાં લગભગ 120 સ્થળોને નિશાન બનાવીને આપ્યો હતો. આ વિમાનો લગભગ એક કલાક સુધી બોમ્બ ફેંકતા રહ્યા હતા. IDF એ પણ જાહેર કર્યું હતું કે અમે ઉત્તરી ઇઝરાયલમાં એક નવું બંધ લશ્કરી ક્ષેત્ર જાહેર કર્યું છે. ભૂમધ્ય સમુદ્રથી પૂર્વ તરફ વિસ્તરેલા લેબેનોનમાં ઇઝરાયલી ગ્રાઉન્ડ ઓપરેશનની શરૂઆત પછી આ ચોથો બંધ લશ્કરી ક્ષેત્ર છે.' હવાઈ હુમલાઓ વિશે માહિતી આપતા, જણાવ્યું હતું કે, 'અમારા વિમાનોએ હિઝબુલ્લાના વિવિધ યુનિટ્સને ટાર્ગેટ કરીને હુમલા કર્યા હતા. જેમાં દક્ષિણી મોરચાના રિજનલ યુનિટ્સ, રાદવાન ફોર્સીઝ, મિસાઈલ અને રોકેટ ફોર્સ તેમજ ઈન્ટેલીજન્સ યુનિટનો સમવેશ થાય છે.'

આ હુમલાઓ પાછળનો હેતુ હિઝબુલ્લાહની કમાન્ડ અને કંટ્રોલ અને ફાયરિંગ ક્ષમતાઓને નષ્ટ કરવાનો હતો. તેમજ ઈઝરાયલે આ હુમલા હિઝબુલ્લાહની કમાન્ડ અને કંટ્રોલ અને ફાયરિંગ ક્ષમતાઓને નષ્ટ કરવા માટે કર્યા હોવાની IDF જાણકારી આપી હતી. તેમજ આ હવાઈ હુમલાઓ ઈઝરાયલના ગ્રાઉન્ડ ઓપરેશનમાં સામેલ સૈનિકોને તેમના લક્ષ્યોને હાંસલ કરવામાં મદદ કરવાના ઉદ્દેશ્ય સાથે કરવામાં આવ્યા હતા. 

સાંજ પડતાંની સાથે જ, યમનમાંથી હુથી દ્વારા છોડવામાં આવેલી બેલેસ્ટિક મિસાઈલને ઈઝરાયલની હવાઈ સંરક્ષણ પ્રણાલી આયર્ન ડોમ દ્વારા હવામાં તોડી પાડવામાં આવી હતી. ઇઝરાયલી સૈન્યએ જણાવ્યું હતું કે લેબેનોનથી હિઝબુલ્લાહ દ્વારા છોડવામાં આવેલા કેટલાક રોકેટને આયર્ન ડોમ દ્વારા અટકાવવામાં આવ્યા હતા અને તેનો નાશ કરવામાં આવ્યો હતો, જ્યારે બાકીના ખાલી વિસ્તારોમાં પડ્યા હતા.

ઇઝરાયેલની સૈન્ય કાર્યવાહીમાં વધારો થયો હોવા છતાં, હિઝબુલ્લાએ સોમવારના દિવસ દરમિયાન 130 થી વધુ રોકેટ છોડ્યા હતા. આમાંથી મોટાભાગના રોકેટ ઈઝરાયલનું ત્રીજું સૌથી મોટું શહેર હાઈફાને નિશાન બનાવીને છોડવામાં આવ્યા હતા.