પાકિસ્તાનમાં રાજકીય ઘમાસાણ:ઈમરાને કહ્યું- ભારત દરેક મામલે આપણાંથી ઘણું આગળ; જીવ જશે કે સરકાર, ગુનેગારોને ક્યારેય માફ નહીં કરું

પાકિસ્તાનના વડાપ્રધાન ઈમરાન ખાનની સરકાર વિરૂદ્ધ સોમવારે નેશનલ એસેમ્બલીમાં અવિશ્વાસનો પ્રસ્તાવ રજૂ થશે. જેના પર વોટિંગ 3 કે 4 એપ્રિલે થઈ શકે છે. માનવામાં આવે છે કે ઈમરાન પોતાની સરકારને બચાવી નહીં શકે. લગભગ 39 સાંસદ તેમનો સાથ છોડી ચુક્યા છે. હાલ સંસદમાં વોટિંગ પહેલા ઈમરાને ઈસ્લામાબાદમાં એક રેલી સંબોધી. દાવો 10 લાખ લોકો આવશે તેવો કરાયો હતો પરંતુ નજરે 1 લાખ લોકો માંડ જોવા મળ્યા. રેલીમાં અનેક મુદ્દાનો ઉલ્લેખ કરાયો. ઈમરાને ઈમોશનલ કાર્ડ પણ ખેલ્યું. તેમને કહ્યું કે- જીવ જશે કે સરકાર. હું ગુનેગારોને માફ નહીં કરું. વિરોધ પક્ષના ત્રણ ઉંદર પોતાના દેશને લૂંટી રહ્યાં છે.

ખાને ભાષણમાં ભારતનો ઉલ્લેખ બે વખત કર્યો. પહેલી વખત ક્રિકેટને લઈને અને બીજી વખત ડેવલપમેન્ટના મુદ્દે. ઈમરાને કહ્યું- આજે ભારત આપણાંથી દરેક મામલે આગળ છે. આ આપણાં પૂર્વ શાસકોની નાલાયકીનું પરિણામ છે. 90ના દશકામાં જ્યારે ભારતીય ટીમ પાકિસ્તાન રમવા આવતી હતી ત્યારે તેમના પ્લેયર્સને લાગતું હતું કે તેઓ કોઈ પૈસાદાર દેશમાં આવી ગયા છે.

ભારતીય સમય મુજબ ઈમરાને સાંજે 7:28 વાગ્યે ભાષણ શરૂ કર્યું અને તે રાત્ર 9:27 વાગ્યે ખતમ થયું.

ઈમરાનના ભાષણની મહત્વપૂર્ણ વાતો

બિલાવલ ભુટ્ટોએ કહ્યું- કેપ્ટન ફરી પિચ છોડી ગયા
પાકિસ્તાન પીપલ્સ પાર્ટી (PPP)ના અધ્યક્ષ બિલાવલ ભુટ્ટોએ આરોપ લગાવ્યો કે ઈમરાન ઈચ્છે છે કે સ્ટેટ ઈન્સ્ટિટ્યૂશન્સ તેમની પાર્ટીના કહ્યાં પ્રમાણે કામ કરે પરંતુ અમે સ્પષ્ટ કરવા માગીએ છીએ કે આગામી ચૂંટણી સ્વતંત્ર અને નિષ્પક્ષ થશે. કોઈ એક ઈન્સાન માટે અમે આપણાં સ્ટેટ ઈન્સ્ટિટ્યૂશન્સને વિવાદાસ્પદ નહીં બનવા દઈએ. ઈમરાન પર કટાક્ષ કરતા બિલાવલે કહ્યું કે, 'કેપ્ટન ફરી પિચ છોડી ગયા, હંમેશાની જેમ. સરકાર અવિશ્વાસ પ્રસ્તાવને ટાળવા માટે દરેક પેંતરા અપનાવી રહી છે.'

પાકિસ્તાનની રાજનીતિ સાથે જોડાયેલા આજના અપડેટ્સ...

શનિવારે પાકિસ્તાનના રાજકારણમાં શું થયું?
શનિવારે મીડિયા સાથે વાત કરતા ગૃહમંત્રી શેખ રશીદે કહ્યું કે તેમણે PM ઈમરાન ખાનને સમય પહેલા ચૂંટણી કરાવવાની માંગ કરી છે. રશીદ ઇચ્છે છે કે 2022-23નું બજેટ રજૂ કર્યા પછી તરત જ ચૂંટણીની જાહેરાત કરવામાં આવે. અહીં વિપક્ષે સંસદના સ્પીકર અસદ કૈસર પર ગંભીર આરોપ લગાવ્યા. ગૃહ સ્થગિત થયા બાદ વિપક્ષી પાર્ટી પાકિસ્તાન મુસ્લિમ લીગ (PML-N)ના નેતા શાહબાઝ શરીફે સ્પીકર અસદ કૈસરને ઈમરાન ખાનની કઠપૂતળી કહ્યા.

વિપક્ષ સાંસદોને ખરીદી રહ્યું છેઃ ઈમરાન
ઈમરાન ખાને કહ્યું કે વિપક્ષો ખુલ્લેઆમ અમારા સાંસદોને ખરીદી રહ્યા છે. જો કે, કેપ્ટને હજુ પણ આશા ગુમાવી નથી. તેમણે આશા વ્યક્ત કરી હતી કે અસંતુષ્ટ સાંસદ ટૂંક સમયમાં જ પીટીઆઈમાં પાછા આવશે. વડાપ્રધાને દાવો કર્યો હતો કે અવિશ્વાસની દરખાસ્ત પાછળ વિપક્ષનો ઉદ્દેશ્ય તેમની સામેના ભ્રષ્ટાચારના કેસો બંધ કરવા માટે સરકારને "બ્લેકમેલ" કરવાનો હતો. પરંતુ તેઓ તેના માટે બિલકુલ તૈયાર નથી.

ઝૂકવાના મૂડમાં નથી PPP, PML-N
પાકિસ્તાનમાં આ સમયે કિંમતો ભયંકર રીતે વધી રહી છે. દૂધ, તેલ, ઘઉં, ઈંડા, વીજળીના ભાવ આસમાને પહોંચ્યા છે. વિપક્ષે આને મુદ્દો બનાવ્યો છે. આ મુદ્દે પૂર્વ પીએમ બેનઝીર ભુટ્ટોની પાર્ટી PPP, નવાઝ શરીફની પાર્ટી PML-Nસરકારને દુર કરવા ઈચ્છે છે. તેમણે આરોપ લગાવ્યા છે કે વડાપ્રધાન ઈમરાન ખાનના નેતૃત્વમાં પાકિસ્તાન તહરીક-એ-ઈન્સાફ (પીટીઆઈ)ની સરકાર દેશમાં આર્થિક કટોકટી અને વધતી મોંઘવારી માટે જવાબદાર છે. અને તેમને સત્તામાં રહેવાનો કોઈ અધિકાર નથી.

પીપીપી અધ્યક્ષ બિલાવલ ભુટ્ટો ઝરદારીએ કહ્યું છે કે ઈમરાન ખાન ઈચ્છતા હતા કે દેશની સંસ્થાઓ તેમની પાર્ટીની ટાઈગર ફોર્સ તરીકે કામ કરે પરંતુ તેઓ આવું થવા નહીં દે. તેમણે કહ્યું કે અમે કોઈને પણ અમારી સંસ્થાઓને એક વ્યક્તિ માટે વિવાદાસ્પદ બનાવવા નહીં દઈએ.

શું ઇમરાન ખાન ખુરશી છોડશે?
પાકિસ્તાનમાં એવી ચર્ચા છે કે અવિશ્વાસ પ્રસ્તાવ પર મતદાન પહેલા ઈમરાન ખાન રાજીનામું આપી શકે છે. આવું એટલા માટે કહેવામાં આવી રહ્યું છે કારણ કે કેટલાક એવા સંકેત પણ મળી આવ્યા છે. હકીકતમાં પાકિસ્તાનના પીએમ ઓફિસની યુટ્યુબ ચેનલનું નામ PMOથી બદલીને ઈમરાન ખાન કરી દેવામાં આવ્યું છે. એવું અનુમાન લગાવવામાં આવી રહ્યું છે કે ઈમરાન આજની રેલીમાં કોઈ મોટી જાહેરાત કરી શકે છે.

શેખ રશીદે ચૂંટણીના સંકેત આપ્યા
પાકિસ્તાનમાં હોબાળા વચ્ચે ચૂંટણીની ચર્ચાઓ ચાલી રહી છે. ગૃહમંત્રી શેખ રશિદે બે વાર કહ્યું છે કે દેશે સામાન્ય ચૂંટણીઓ માટે તૈયાર રહેવું જોઈએ. શનિવારે મીડિયા સાથે વાત કરતા તેમણે કહ્યું કે તેમણે પીએમ ઈમરાન ખાનને સમય પહેલા ચૂંટણી કરાવવાની માંગ કરી છે. શેખ રશીદ ઈચ્છે છે કે 2022-23નું બજેટ રજૂ કર્યા બાદ તરત જ ચૂંટણીની જાહેરાત કરવામાં આવે. ફરી એકવાર તેમણે કહ્યું હતું કે પાકિસ્તાનમાં સમયથી પહેલા સામાન્ય ચૂંટણીઓ યોજાઈ શકે છે, જો કે બાદમાં તેમણે પોતાનું નિવેદન ફેરવી તોળ્યું હતું.

પાકિસ્તાનમાં એકપણ વડાપ્રધાન 5 વર્ષ પૂરા કરી શક્યા નથી
પાકિસ્તાનમાં લોકશાહીનો મિજાજ કંઈક એવો રહ્યો છે કે ત્યાં લોકશાહી ક્યારેય ખીલી શકી જ નથી. ભારત વિરોધ, કાશ્મીર રાગ, શસ્ત્ર માટેની દોડ અને ધાર્મિક કટ્ટરતામાં આ દેશ ક્યારેય વિકાસ પામી શક્યો નથી. આ દેશમાં આજ સુધી એકપણ વડાપ્રધાન તેમના પાંચ વર્ષનો કાર્યકાળ પૂર્ણ કરી શક્યા નથી. ક્યારેક લશ્કરી સરમુખત્યારોએ લોકો દ્વારા ચૂંટાયેલા પીએમને કચડી નાખ્યા, તો ક્યારેક અદાલતોએ પીએમને ગેરલાયક ઠેરવ્યા. અથવા તો કેટલીકવાર પોતાના જ કાર્યોથી સરકાર પડી ગઈ. જો ઈમરાનની સરકાર પડી જશે તો તેમને આ ત્રીજી કેટેગરીમાં સામેલ કરવામાં આવશે.

જો તમને પાકિસ્તાનની રાજનીતિમાં 5 વર્ષ પહેલા જુલાઈ 2017ની ઘટના યાદ હશે તો તમને પનામાગેટ પ્રકરણ યાદ હશે. પાકિસ્તાનની સુપ્રીમ કોર્ટે એક ઐતિહાસિક ચુકાદામાં પનામાગેટ કેસમાં તત્કાલિન વડાપ્રધાન નવાઝ શરીફને પીએમ પદ માટે અયોગ્ય ઠેરવ્યા હતા અને તેમને વડાપ્રધાન પદ પરથી હટાવી દીધા હતા. સુપ્રીમ કોર્ટની પાંચ જજોની બેન્ચે સર્વસંમતિથી પોતાના નિર્ણયમાં નવાઝ શરીફને પનામા કેસમાં દોષી ઠેરવ્યા હતા. આ પહેલા પાકિસ્તાનના આર્મી ચીફ રહેલા પરવેઝ મુશર્રફે પણ નવાઝ શરીફને પીએમ પદ પરથી હટાવી દીધા હતા.