રશિયા-યુક્રેન યુદ્ધનો 11મો દિવસ LIVE:અત્યાર સુધી 15 લાખથી વધુ લોકોએ યુક્રેન છોડ્યું; રશિયામાં પ્રતિબંધોની અસર દેખાવા લાગી- ખાદ્યપદાર્થોનું બ્લેક માર્કેટિંગ શરુ

બ્રિટનના PM જોનસને રશિયાનો સામનો કરવા માટે એક પ્લાન બનાવ્યો
યુક્રેનની સંસદે દાવો કર્યો છે કે બ્રિટનના PM બોરિસ જોનસને રશિયાનો સામનો કરવા માટે 6 મુદ્દાની યોજના બનાવી છે. મળતી માહિતી મુજબ જોનસન કેનેડા, નેધરલેન્ડ, ચેક રિપબ્લિક, હંગેરી, પોલેન્ડ અને સ્લોવાકિયાના નેતાઓ સાથે આ યોજના અંગે ચર્ચા કરશે.

રશિયન RIA ન્યૂઝ એજન્સીએ જણાવ્યું હતું કે રશિયાના વિદેશ મંત્રાલયે યુરોપિયન યુનિયન અને નાટો દેશોને યુક્રેનને "શસ્ત્રો મોકલવાનું બંધ કરવા" કહ્યું છે. જેમાં વધુમાં કહેવામાં આવ્યું છે કે મોસ્કો ખાસ કરીને એ વાતથી ચિંતિત છે કે પોર્ટેબલ એન્ટિ-એરિયલ સ્ટિંગર મિસાઇલો આતંકવાદીઓના હાથમાં આવી શકે છે, જે એરલાઇન્સ માટે ખતરો બની શકે છે.

પુતિને ફરીવાર ધમકી ઉચ્ચારી
છેલ્લા દસ દિવસથી યુક્રેન પર કબજો મેળવવા માટે ભયાનક હુમલા કરી રહેલી રશિયન સેના અને રશિયાના રાષ્ટ્રપ્રમુખ વ્લાદિમીર પુતિન યુદ્ધ ખતમ કરવાની કોઈ ઈચ્છા ધરાવતા ન હોવાનું પ્રતીત થઈ રહ્યું છે. એવામાં હાલમાં જ પરમાણુ હુમલાની ચીમકી આપી ચૂકેલા પુતિને ફરી એકવાર ધમકીભર્યા સૂરમાં કહ્યું હતું કે પશ્ચિમી દેશો દ્વારા રશિયા પરના પ્રતિબંધો યુદ્ધની ઘોષણા સમાન છે.

તેમણે આ સાથે એવી પણ ધમકી આપી છે કે જો યુક્રેન પર નો-ફ્લાય ઝોનની કોઈપણ ચેષ્ટા થશે તો એ સમગ્ર વિશ્વ માટે વિનાશકારી પરિણામ લાવનાર સાબિત થશે. ઉલ્લેખનીય છે કે હાલમાં જ યુક્રેનના રાષ્ટ્રપતિ વોલોદિમીર ઝેલેન્સ્કીએ NATO પર આરોપ લગાવ્યો હતો કે યુક્રેન પરના રશિયન હવાઈ હુમલા તેણે યુક્રેનના આકાશને નો-ફ્લાય ઝોન ઘોષિત ન કર્યુ તેને આભારી છે. આ જ વાતના સંદર્ભમાં રશિયન રાષ્ટ્રપ્રમુખે પશ્ચિમી દેશોને ચીમકી આપી હતી.

યુક્રેન માટે એક દેશ તરીકે બચવું હવે મુશ્કેલઃ પુતિન

રશિયા અને યુક્રેન વચ્ચે યુદ્ધથી સતત ગંભીર સ્થિતિ સર્જાઈ રહી છે. રશિયા અને યુક્રેન વચ્ચે ચાલી રહેલા યુદ્ધની 10મા દિવસે રશિયાના રાષ્ટ્રપતિ વ્લાદિમીર પુતિન તરફથી આ અંગે અનેક નિવેદનો આવી ચુક્યા છે. પુતિને કહ્યું કે યુક્રેનમાં ખાસ સૈન્ય અભિયાન શરૂ કરવાનો નિર્ણય ઘણો મુશ્કેલ હતો. આ સાથે પુતિને એમ પણ કહ્યું છે કે યુક્રેનમાં સૈન્ય અડ્ડાઓનો સફાયો કરવાનું કામ લગભગ પૂરું થઈ ચુક્યું છે. તેમણે કહ્યું કે યુક્રેનના લિડરશીપે એ વાત સમજી લેવી જોઈએ કે જે પણ કરી રહ્યા છે તે આગળ પણ ચાલુ રહેશે તો એક દેશ તરીકે તેને બચવું મુશ્કેલ બની જશે. આ માટે યુક્રેન પોતે જ જવાબદાર હશે.

ઈઝરાયલના PM નફટાલી ઓચિંતા મોસ્કો પહોંચ્યા
ઈઝરાયલના વડાપ્રધાન નફ્ટાલી બેનેટ શનિવારે ઓચિંત જ મોસ્કો પહોંચ્યા છે. તેમની સાથે ઈન્ટેલિજન્સ ચીફ તથા અન્ય ઉચ્ચ અધિકારીઓ તેમની સાથે છે. ન્યૂ યોર્ક ટાઈમ્સના જણાવ્યા પ્રમાણે વ્લાદિમીર પુતિન અને બેનેટ વચ્ચે વાતચીત ચાલી રહી છે. યુક્રેનના રાષ્ટ્રપતિ વોલ્દોમિર ઝેલેન્સ્કીએ બેનેટને મધ્યસ્થતા કરવા માટે અપીલ કરી હતી. ઈઝરાયલનું વલણ અત્યાર સુધી તટસ્થ રહ્યું છે. બેનેટ અંગે કહેવામાં આવી રહ્યું છે કે તેઓ પુતિનને સંપૂર્ણ યુદ્ધ વિરામ માટે તૈયાર કરી શકે છે.

7 માર્ચે ત્રીજા તબક્કાની વાતચીત યોજાશે
સશસ્ત્ર સૈન્ય સંઘર્ષ વચ્ચે રશિયા અને યુક્રેન સોમવારે ત્રીજા તબક્કાની વાતચીત કરી શકે છે. યુક્રેન તરફથી વાતચીતમાં સામેલ થયેલા ડેવિડ અરખમિયાએ કહ્યું કે યુદ્ધને ખતમ કરવા માટે વાતચીત કરવામાં આવશે. આ સાથે એવી માહિતી પણ મળી છે કે આગામી 7 માર્ચના રોજ રશિયા-યુક્રેન વચ્ચે ત્રીજા તબક્કાની વાતચીત યોજાશે