અમદાવાદઃ ગરીબોનું અનાજ અમીરો લઈ ગયા, એક કરોડનો ફ્લેટ છતાં મફતમાં લીધું રાશન

કોરોનાની મહામારીને કારણે લોકડાઉન જાહેર કરાયું છે. જેને કારણે ગરીબ પરિવારોને ખાવાનાં પણ ફાંફા ન પડે તે માટે સરકાર દ્વારા બીપીએલ અને એપીએલ કાર્ડધારકોને મફતમાં અનાજ વિતરણ કરવામાં આવ્યું હતું. પણ ગરીબો માટે સરકારની આ યોજનાનો અમીરોએ ગેરલાભ ઉઠાવ્યો છે. અમદાવાદના સેટેલાઈટમાં એક કરોડના ફ્લેટમાં રહેતાં દંપતીએ એપીએલ કાર્ડ પર રાશન લેતાં તેમની સામે નોટિસ ફટકારવામાં આવી છે.

માનવતાને શર્મસાર કરતો આ કિસ્સો અમદાવાદના સેટેલાઈટનો છે. સેટેલાઈટમાં એક કરોડના ફ્લેટમાં રહેતાં દીપક શાહ અને તેમના પત્નીએ ઘરમાં ભોજન ન હોવાની તંત્રને રજૂઆત કરી હતી. જે બાદ તેઓએ એપીએલ કાર્ડ મારફતે મફતમાં રાશન લીધું હતું. જો કે આ અંગે પ્રશાસન દ્વારા તપાસ કરવામાં આવતાં સમગ્ર મામલો સામે આવ્યો હતો.

સાધન સંપન્ન લોકો દ્વારા જ આ રીતે સરકારી યોજનાનો ખોટો લાભ લેવામાં આવી રહ્યો છે જે અત્યંત દુઃખદ બાબત છે. ગરીબોના અન્નનો કોળિયો અમીરો છીનવી રહ્યા છે. આ મામલે અમદાવાદના ડેપ્યુટી કલેક્ટર દ્વારા સેટેલાઈટના શાહ દંપતીને નોટિસ ફટકારવામાં આવી છે. અને તેમના વિરુદ્ધ ડિઝાસ્ટર મેનેજમેન્ટ એક્ટ હેઠળ કાર્યવાહી પણ થઈ શકે છે.